106. කොච්චි මිරිස්

"අපි වවමු රට නගමු" සංකල්පය මතක ඇතිනෙ. ඒ කාලෙ කවුරු කවුරුත්. ගෙදර දොරෙ වතුපිටිවල ඉඩ නැත්නම් ඉඩහදාගෙන ගස් උඩයි වහලවල් උඩයි ටයර ඇතුලෙයි හිස් ප්ලාස්ටික් බෝතල්වලයි එකී මෙකී නොකී හැමතැනකම ගජරාමෙට පැල හිටෙව්වා.


ඉතින් අපෙ ගෙදර කියලා වෙනසක් නෑ එහෙත් එහෙමයි. අපෙ ගෙදරත් මාලු මිරිස් කොච්චි මිරිස් බටු මිරිස්, වැරණියා මිරිස් වගෙ මිරිස් පැලත් තිබ්බ්ටු වම්බටු වගෙ බටු පැලත් කලින් කියපු සංකල්පෙට අනුව වගාකරලා තිබුනා. එහි අස්වැන්න අපි පරිබෝජනයට නොගත්තාමත් නොවේ.


සංකල්පෙට අවුරුදු දෙක තුනක් ගෙවුනත් පල දරන්නෝ හිටියත් නොහිටියත්. අපේ ගෙමිදුලෙනම් එහි සාර්තකත්වයක් නොතිබුනාම නොවේ. …

කාන්තා පාර්ශවය වැඩි වශයෙන් ඉන්න ගෙදරක එළවලු පැල විතරක්ම තියෙන්නත් බෑනේ. දුවලා දෙන්නත් මල් පැල වලට නම් හරි උනන්දුයි. නිතරම ප්‍රදර්ශනවලට ගිහින් ලොකු රොසමල් පිපුන පැල උස්සගෙන එනවා. හැබැයි ගෙනල්ලා පෝච්චි වල හිටවලා මල පරවෙනකන් සාත්තු සප්පායම් කරනවා . ඔහොම ගෙනාපු සෑහෙන්න රෝස පැල පඳුරට වැවිලා දැන් තියනවා ගෙමිදුලෙ පැත්තක. 


 මිදුලෙ අලංකාරයටත් එක්ක මේ කතන්දරය ලියන ලොකු ජෝන්ගෙ ආදරණීය භාර්යාව විසින් ඔය තැඹිලි පාට කහපාට දම් පාට වගෙ මල් පිපෙන ගස් වර්ගයි, අර ලස්සන රතු පාටට සෑහෙන්න කාලයක් මල් පිපිලා තියන ඇන්තූරියම් පැල කීපයකුත් පොල් ලෙලි, ලනු කැරලි ඔතලා උලු කැට ගඩොල් කැට කොහුබත් පුරවලා සෑහෙන්න මහන්සියක් දරලා ඉන්දලා තිබුනා. ආදරයෙන් හිටවලා ආදරයෙන් රැකබලාගෙන නිතර දෙවේලෙ අතපත ගාන පැල්යක මලක් පූදිනකොට දැනෙන සතුට වචනෙන් කියන්න බෑනෙ. අන්න ඒවගෙ අවස්තාවක් පහුගිය සතියෙදි උදාවෙලා තිබුනා. ඇන්තූරියම් වගාවෙ පැල කීපයක ලස්සන රතුවට පොහොට්ටු කීපයක් ඇවිල්ලා.

කතාවෙන් කතාවෙන් වෙන පැත්තකට ගියා. ඒ හන්දා අද කතාවට යොමු වෙමු. ශනිදාව කියන්නෙ නිවාඩු දවසක් ඒත් එදාට ගෙදර වැඩනම් එමටයි. ලොකු දුව පොත පතෙ වැඩ කරන අතරෙ පොඩි දුව වත්තෙ සෙල්ලම් කරමින් උන්නා. මටත් වත්තෙ කැලේට වැවිලා තිබුන අති ඉති සුද්ද කරමින් ඩෙංගු මර්දනයට ලෑස්ති උනා. දහවල ලබමින් තිබුන නිසා මගෙ ප්‍රිය බිරිඳ උන්නේ මුලුතැන් ගෙයි.

"චූටි දූ ඔය කොච්චි මිරිස් පැලෙන් කොච්චි කරල් දෙක තුනක් කඩාගෙන එන්න"


ඇය කියනවා මට ඇහුනා. ටික වෙලාවකින් මමත් මුලු තැන්ගෙය පැත්තට ගියෙ වතුර ටිකක් බොන්න  මෙන්න මගෙ චූටි දෝනි එතකොට තමයි අම්මාගෙ ඉල්ලීම ඉටු කරගෙන ආවෙ

 "ලස්සන මිරිස් කරක් දෙකක් තිබුනා ඒ හින්දා ඒකත් කඩාගෙන ආවා  අම්මට කැමට දාන්න " 

එතකොටත් අර ලස්සන ට පීදිලා තිබුන ඇන්තූරියම් පොහොට්ටු දෙක චූටි කෙල්ලගෙ අතෙ. හිතට දුක අපි දෙන්නටම ආවත් චූටි කෙල්ලගෙ මූනෙ තිබුන හිනාව දැක්කම ඒ මල් පිපුනට වඩා සතුටක් දෙන්නගෙම හිතට ආවා . 

Image location