92.ඇමෝනියා ගඳ

පෙට්ටගමෙ බොහෝ කතාවලට සම්බන්ද සිරිල්ගෙයි, සිරිල්ගෙ ලොක්කගෙයි කතන්දර පෙට්ටගම නිතර හාර අවුස්සන අයට නම් අමතක නැතිව ඇතිනෙ. "නොදන්නා කෑම කෑමේ විපාක" නම් කතාවෙන් පස්සෙ සිරිල් එක්ක ගමන් යන එක ලොක්ක නැවත්තුවා. ඊට පස්සෙ ලොක්කා එහෙ මෙහෙ යන්න තෝරගත්තෙ මතුගම පැත්තෙ හාදයෙක්ව.



 මේ කාලෙදිම ලොක්කා ගත්තා අලුත්ම අලුත් ඉන්ටර්කූලර් එකක්. මේ සිද්දිය වෙලා තියෙන්නෙ ඉන්ටර්කූලර් ආපු කාලෙ හන්දා කාලෙ ගැන හිතා ගත හැකියැයි මම හිතනවා.


 ඔන්න එදත් දුරපලාතක සේවා දායකයෙක් හමුවෙන්න ලොක්කා ගියා. ගියෙ අර කියුව මතුගම හාදයත් එක්ක. කොහොමටත් ලොක්කත් එක්ක කවුරුත් යන්න අකමැති එයාගෙ පම්පෝරි කතා අන්හන්න වෙන හන්දා. 

ඔය මතුගම හාදයා ලොක්කත් එක්ක යනකොට හැමදාම වාහනේ නිදාගෙන තමයි යන්නෙ. ඇහුවොතින් කියන්නෙ වාහනෙ යනකොට වමනෙ යන හන්දා කියලා. ඉතින් ලොක්කටත් ඕනෙ වාහනෙ මග හිටියොත් තනිකම මකාගන්න කෙනෙක් හන්දා නිදාගෙන හරි යන එකට ලොක්ක කැමතියි.


දැන් ආපහු කොළඹ එන ගමන්, ලොක්ක කොහොමත් යන්නෙ වාහනේ AC වැඩිම කරගෙන. ඒ හන්දා හොඳට නින්දත් යනවා. අවිස්සාවේල්ල කිට්ටුවෙදි මතුගම හාදයට ඇහැරිලා ඒත් ලොක්ක දැක්කොත් පම්පෝරි කතාවට අල්ලගන්න නිසා නිදි වගෙ ඉඳලා. 

එදා ඊස්ට් රොටි කතාවෙදි වගේ ලොක්කගෙ බඩ පැලෙන්න කාලා තමයි එදත් ඇවිත් තියෙන්නෙ. හංවැල්ල කිට්ටුවට ඒද්දි ලොක්ක නිදියන් ඉන්න මතුගම හාදයා දිහා හොඳට බලලා නිදි බව දැනිච්ච නිසා , හොඳට පස්ස උස්සලා සද්දෙට අධෝ වාතය තුන් හතර වතාවක් පිටකරලා. 

ඉන්ටර්කූලර් එක ඇතුලෙ තත්වය ගැන කියවන ඔබට අමුතුවෙන් කියන්න උවමනා නෑනෙ. ඉන්නම බැරි තැන මතුගම හාදයා නැගිටලා නාසය හකුලවන ගමන් ලොක්ක දිහා බලලා 

ලොක්ක අහිංසක විදියට බලනගමන් 
 "මේ මේ මේ පැත්තෙ රබර් වතුවල ඇමෝනියා ගඳ " කියලා වාහනේ වීදුරුව පාත් කරලා.