99.මම ලොකු ජෝන් වීමෙ කතාව

හරියටම කියනවනම් 1983 අවුරුද්දේ මුල් පාසැල් වාරය. මගෙ ලොකු මලයා පාසැලට ඇතුලත් කරපු අවුරුද්ද. පානදුරෙ ඉදන් පාසැල් බස් රථයෙන් පාසැල වෙත ගිය මට මලයාවත් කැටුව පසැලට යන එක අමුතුම අත් දැකීමක්. තාත්තා පානදුරයෙන් මාවත් මල්ලිවත් පාසැල් බස් රථයට බාරදීම සිදුකරයි. කමල් අයියා, අතුල අයියා, චතුර අයියා, තුශාර අයියා   වැනි වැඩිහිටි පාසැල් සිසුවෙකුට අපි දෙදෙනාව භාර දෙන්නේ බස් රථය තුලදී අපේ ආරක්ෂාව ගැන බලන්නටය. මෑත යුගය හා සසඳනවිට ආරක්ශාව ගැන දෙමාපියන් බිය වියයුතු නොවන්නෙ අදමෙන් පිරිහීගිය සමාජ වටපිටාවක් එකල නොතිබූ බැවිනි.



…පානදුරයෙ සිට කොළඹට පාසැල් යන කුඩා සිසුන් එකල විරලය. 5 ශ්‍රෙණිය සමත්ව කොළඹ පාසැලකට යනවා විනා පානදුර වැනි කොළඹින් සැතපුම් 17ක දුරක සිට සිසුන් ඇතුලත්කර ගැනීම, ඇතුලත් කර ගැනීමෙ ක්‍රමවෙදයට කොහෙත්ම ළං කල නොහැකි සුදුසු කමකි. අපෙ අම්මාගෙ මහගෙදර පුංචි බොරැල්ලෙ පිහිටා තිබීම නිසා ඉහත සුදුසුකම සපුරා ගැනීමට අපට හැකිවිය. උදෑසන 7.15ට අවදිඋනත් 7.30ට පෙර පාසැලට යාමට හැකියාවක් එහි වෙසෙනවිට අප සතුවිය.


නිවස කුඩාවුවත් ඡන්ද හීමි නාමලේඛනයට අනුව නිවැසියන් 53දෙනෙකු එහි වාසය කරයි. මෙය අප මහගෙදරට පමනක් පොදු වූවක් නොව අප මහගෙදර අවට සෑම නිවසකම පොදු සත්‍යයකි.  පාසැලට ඇතුලත් කරගත්තාට පසු නැවත අපෙ සුපුරුදු නිවසේ සිට පාසැල් යාමට සිදුවේ. පානදුරයෙ සිට පාසැල් යාමට අප තෝරාගත්තෙ පාසැල් බස් රථයයි.


දැන් කාලෙ දක්නට නොලැබෙන බාගේ ලේලන්ඩ් වර්ගයේ CTB බස් එකක් එකල පාසැල් සේවයට පානදුරේ සිට නාලන්දාව දක්වා යොදවා තිබුනි. බසයේ හරි මැදින් කුඩා ප්‍රමානයේ දොරක් ඇති අතර බසයට නැගීම සහ බැසීම සිදුකරන්නෙ එම එකම දොරෙනි. ඉහත පින්තූරයෙ තිබෙන්නෙ එවැනි බස් රථයකි. පිටුපස ඇති හදිසි දොරටුව විවෘත කරගන්නා ලොකු අයියලා පාසැලට යනතෙක් ගීත ගායනා කරයි

පැළඳ කටුගස්තාන

මගම ඩක්කුව ගේන

අපේ කොන්දොස්තර මැතිදා වීරයා .....

හූ හූ

අපේ කොන්දොස්තර මැතිදා ගොරකයා...

ලෝක පූජිත වූයේ
කොන්දෝ පරම්පරාවෙ
ලෝක පූජිත වූයේ
කොන්දෝ පරම්පරාවෙ

…සිංහ සෙයියාවෙන් මැශින් එකෙන් ටිකට් කඩන්නෙ 

ඉතිරි සල්ලි නොදෙන්නේ … 

ඔය බස් එකේ යන හැමෝම ජාතික ගීයකියන්නාසේ කියන ගීතයක්.


ඒ කාලෙ අපෙ බස් එකේ රියදුරු වැඩේයි කොන්දොස්තර වැඩේයි කලේ ජයසිරි අය්යා සහ සැම්සන් අයියා. සැම්පා කියලා අපි ආදරේට කියන්නේ. පස්සේ කාලෙක පොර ටික්කෙක් හැටියට උසස්වීමක් ලබලා විශ්‍රාම ගියා. ජයසිරි අය්යා නම් අපේ පාසැල් බස් රියම ඉස්සරහින් ආව බස් එකක වද්දවලා රස්සාවෙන් දොට්ට දැම්මා. දැන් ජයසිරි අයියා මාර්ග අංක 183 නුගෙගොඩ පානදුර බස් එකක් පදවනවා. හවසට බාර් එක ළඟ වැටෙන්න ගහලා ඉන්නවා නම් නිතරම දකින්න ලැබෙනවා.


…අපේ පාසැල් බස් රථයෙන් ගුරුවරියන් තිදෙනෙකුම පාසලට ගියේය. ඒ තිදෙනා සිටියත් නැතත් බස් එකෙ අයියලා කිසිදවසක කුණුහරුප ගීත ගායනා කලේ නැත.ඒ කාලේ හැටියට අයියලා කල ලොකුම නොහොඹිනා කටයුත්තනම් "පොදු පාසැල් පුරහල" නම් බාලිකා පාසැල් බස් රථයට උසුලු විසුලු කිරීමය. …


උසස් පෙල සිසුන් පමනක් පාපුවරුවේ එල්ලී යයි. ජේශ්ඨයා සැමවිටම පහලම පඩියෙ යයි.සමහර විටක පොලිස් නිළධාරින් දෙහිවල වැල්ලවත්ත අතර මගදී වේවැල් වලින් පාපුවරුවෙ යනවුන්ට පහර දෙයි. එවිට දින කීපයකට පාපුවරුව නිදහස් වෙයි.


…මතු සම්බන්දයි ....(මට නිදි මතයි තව ලියන්න ඇතත් දැන් ලිවීමට නොහැක )


මතු සම්බන්ද ලිපියට මෙතනින් යන්න  (යාවත්කාලීන දිනය 14-06-2012)  







 පින්තූරය උපුටා ගැනීම "SLTB buses - ශ්‍රී ලංගම බස්"