96. සිරා වැල්ල ( කොළඹ ආ හැටි )

චන්දරේ කොළඹ ආපු කතාව පහුගිය දවසක දැම්මනේ නොබලපු අය ඉන්නවනම් මෙන්න ලින්කුව "චන්දරෙ කොළඹ ආ හැටි" ගිහින් බලා ගන්න. මොකද මේ කතන්දර මාලාවෙ නිදන් කතාව තියෙන්නෙ එතන. ඒක නොකියෙව්වා කියලා මෙ කතාව වෙනම කතාවක් හැටියට කියවන්න අපහසු නෑ.


අද කියන්නෙ චන්දරේගෙ සගයා "සිරා" කොළඹ ආපු හැටි. මෙ දෙන්න එකතුවෙලා සොසේජස් බැදපු හැටි මතක ඇතිනෙ මතක නැත්නම් "මල්ටි purpose අයන්" මෙතනින් පොස්ටුවට යන්න. ඒ කතාවට අනුව මෙ දෙන්නගෙ බඩවලුත් දැන් හරි ගානට පදම් වෙලා. අවුරුදු ගානකට පස්සෙ බඩවල් පදම් උනාට කොළඹ එනකොටනම් එහෙම නෑ කියලා තමා තතු දන්නෝ කියන්නෙ. කොහොමින් කොහොම හරි මෙන්න මෙකයි අද කතන්දරය



ඔය "සිරා" "සිරා" කියලා කෙටියට කියුවට මේ අර අනිත් කතාවල ඉන්න සිරිල්ම තමා. වැලිගම පැත්තෙ මුහුදු වෙරළ පෙනෙන මායිමෙ, මුහුදු රළ පා ගැටෙන මායිමෙ, පුංචි කාලෙ ඉඳලා හැදී වැඩුන නිසා ටිකක් හයියෙන් කතාකරන පුරුද්දක් සිරිල්ට තියනවා. ඒ ගැනත් කතාවක් තියනවා ඒවා පස්සට.


චන්දරේව හොයන්න ගියා වගේම ලොක්කා වැලිගම පැත්තෙ ගිහින් සිරිල්වත් හොයා ගත්තා. එයාවත් ලොක්කාගෙ වාහනේම දාගෙන කොළඹ ඇවිත්. චන්දරේ නවතින්න හොයාගත්ත තැනම නවතින්නත් හදලා දීලා. බෝඩිම කිට්ටුවෙන්ම කෑමට තැනකුත් හොයලා දීලා. සිරාත් කන්න බොන්න හෙම දන්නෙම නෑ.


පහුවනදා උදේ තමයි ප්‍රශ්නය පැන නැගලා තියෙන්නෙ. කාපු බීපුවා පිටකරන්නත් එපැයි. කොච්චර උත්සහා කලත් වැඩේ වෙන්නෙ නෑලු. තටමලා තටමලා .. කොහෙද කොහොමහරි එක දවසක් නෙමෙයි දවස් දෙකක් තුනක්, කාපුවා පිටකරගන්න බැරිව සිරිල් තටමනවලු.


හතර වෙනි දවසෙ සිරිල් නිවාඩු දාලා ආපහු ගිහින් වැලිගම. පහුවෙනිදා මිනිහා එනවලු පෝර ගෝනියක් උස්සගෙන. කෙලින්ම ගෝනියත් උස්සගෙන ගියාලු බෝඩිමෙ පිලිකන්න පැත්තට. ගෝනියම එකපාර හැලුවලු බිම.


මුහුදු වැලි. මුහුදු වැලි කියුවෙ වැලිගම මුහුදු වෙරළින්ම ගත්තුවා. පුංචි කාලෙ ඉඳලා පුරුදුවෙලා තියන විදියට කාපුවා පිට කරන්න නම් පුරුදු වැල්ලම එපැයි.