124.පෝලිමට පිටින්

මගේ මේ කතාව ටිකක් පරන එකක්.  මේ සිද්දිය වෙලා තියෙන්නෙ රජයෙ බැංකුවකදි. රජය කියපු ගමන් තරහගන්න උදවිය ඉන්නවනම් දැන්ම තරහව ඉවර කරගන්න. තරහව ඉවර කරගන්න කියුවෙ මෙ කතාව කියන කොට තිබුන රජය ඒ ගොල්ලන්ගෙ හන්දා. කොහොමත් කියන්න යන කතාවනම් කිසිම රජයකට සම්බන්ද කතාවක් නෙමෙයි. කාලය 89-90 විතර ඇති.

පහුගිය රුපියල් සත සහ මනුස්සකම කියන කතාවෙදි මම කියුවනේ අපේ අම්මා රාජ්‍ය බැංකුවක වැඩ කලේ කියලා මේ ඇයට උන සිද්දියක්.

බැංකුවල වැඩ අධිකම දින කීපයෙන් එකක් තමයි විශ්‍රාම වැටුප් ගෙවන දිනය. සාමාන්‍යයෙන් මාසෙ 10වනදා තමයි ඔය විශ්‍රාමිකයන්ගෙ සතුටුම දවස. ළමයින්ගෙන් වැඩිපුර සැලකිලි ලැබෙන්නෙත් ඔය දවසටනේ. 

වයසක දෙමවුපියන්ව උදේම බැංකුව ලඟින් කාර් එකේ බස්සලා යන ළමයිනුත් මෙ අතරෙ නැතුවම නෙමෙයි. සමහර වයසක අය උදෙ 9ට බැංකුව විවෘත කලාට විශ්‍රාම වැටුප් පෝලිමට එන්නේ උදෙ 6ට විතර.බැංකුවෙ පඩියකට හෙත්තු වෙලා බැංකුව අරිනතුරු මග බලාගෙන ඉන්නවා. සමකාලීනයන් සමග ආගිය තොරතුරු කතාකරමින්. වැඩිහරියක් තම තමන්ගේ දූ පුතුන්ගෙ වරුනාව. ඒත් පංපෝරියට කියෙව්වට ඒ බොහෝමයක් දෙමාපියන්ගේ මනඃකල්පිත කතා.


ඔන්න හරියට 9ට බැංකුවේ දොර විවෘත කරන කොටම විශ්‍රාම වැටුප් පෝලිමට කට්ටිය එකතු වුනා.ඔය පෝලිම 9 සිට 2.30 වනතෙක්ම නොකඩවා ඇදෙන පෝලිමක්. 

එදා අපෙ අම්මත් ඉඳලා තියෙන්නේ ඔය එක කවුන්ටරයක. කොහොමත් ඔය කවුනටරෙ ඉන්නකොට ළඟම ඉන්න කෙනා දෙස මිස ඊට පිටුපස ඉන්න අය ගැන බලන්න ලැබෙන්නෙ නෑ.

 අම්මා උන්න කවුන්ටරයෙ විශ්‍රාම වැටුප් ගන්න අයට අමතරව තව තව කට්ටිය ඉඳලා තියනවා. ටික වෙලාවක් ගනුදෙනු කරමින් ඉන්නකොට අම්මා දැකලා තියනවා අවුරුදු 75ක විතර ජාතික ඇඳුම ඇඳගත්තු කෙනෙක් අම්මා දිහා බලාගෙන ඉන්නවා. අම්මා ඒ මනුස්සයව දැකලා තියෙන්නෙ ටිකවෙලාවක් ගියාට පස්සෙ. පෝලිමේ ඈත් කෙලවරක උන්න ඔහුව දුටු සැනින් ඇය හිඳි පුටුවෙන් නැගිටලා ඔහු ළඟට ගිහින් ඔහුගේ අතෙ තිබුන පෝරමය රැගෙන ඔහුට අදාල විශ්‍රාම වැටුප් මුදල වහාම ලබාදී ඔහුව පිටත් කරලා.

 ඔන්න ඉන් පස්සෙ අම්මා ඉන්න කවුන්ටරයට අදාල පෝලිමෙන් කසු කුසු අස්සෙන් රැවුම් ගෙරවුම් හඬ ඇසෙනවලු.

"අපිත් පෝලිමෙ  ඉන්නේ හුඟවෙලාවක ඉඳලා තමයි "

"පිටිපස්සෙ ඉන්න අයට ඉස්සරවෙලා දෙන්න නම් පෝලිම් මොනවටද ? "

ඔය වගේ නොයෙක් අවලාද ඇහෙනවලු. අපේ අම්මට හරියට කේන්තියනවා . නැගිට්ටලු පුටුවෙන්

 "මේ ඔය කියවන හැමෝටමයි මම මේ කියන්නේ. ඒ මම උදවුකලේ මට පුංචි කාලේ උගන්නපු ගුරුවරයෙකුට. කාට හරි ප්‍රශ්නයක් තියනවනම් කළමනාකාර තුමාට පැමිනිලි කරන එකයි ඇත්තෙ."


…
…පසු සටහන
…මේ කතාව මතක් උනේ අද ඔක්තොම්බර් 5වනදා. අද "ගුරු දිනය" ගුරුවරුන් අපිට ඉගැන්වුයෙ අපෙන් කිසිම දෙයක් බලාපොරොත්තුවෙන් නෙමෙයි. ඒත් ඒ අය බලාපොරොත්තු නොවන වෙලාවක අපිට යමක් දෙන්න පුලුවන්නම්, ගුරුවරයෙකුට කරන්න පුලුවන් හොඳම උපහාරය ඒකයි කියලා මට හිතෙන්නේ. 

Image Source: Microsoft Clipart

සිංහලෙන් ලියන අය වෙනුවෙන් පටන්ගත්තු සිංඩියට ඔබේ බ්ලොග් එකත් එකතු කරන්න
http://i-am-a-blog-reader.blogspot.com/